小市民週記

• 我係一個市民，亦都係一個男人。
• 
  
• 我每日都鍾意打罵我個老婆，我指揮佢做東做西，佢莫敢不從。
• 
  
• 近期，我仲鍾意將她的家人都操縱埋一份，要他們同我清理屋企、抺車、做跑腿。
• 
  
• 我原本係一個小男人。
• 
  
• 諗番起嗰個時候，老婆喝我，我都唯命是從。嗰陣我天真咁認為，老婆喝我，係為我好，我受到佢既保護，應該好高興。
• 
  
• 直到嗰日，我遇上一個乞衣。嗰個乞衣，係喺中環下面乞食既，我又同情佢喎，咁就俾咗幾毫子佢啦，點知佢捉住我同我講道理。原來佢以前係個律師嚟喎，不過市道唔好，所以而家轉咗行搞人民運動。吓？人民運動？乜Q嚟架？佢唔係做乞衣架咩？
• 
  
• 佢又慢慢同我解釋。原來佢既乞衣身份只係一個掩飾，佢正職就係周圍搧動人遊行，得閒又幫人抬下棺材示威。咦？幾過癮喎﹗

===================================================================

• 
• 
  
• 自從嗰日見過個律師乞衣之後，我既生活又回復正常，日日都係咁怕老婆。
• 
  
• 今日，我又喺中環撞到嗰條茂利。
• 
  
• 佢捉住我，問我有冇聽過廿三條。廿三條？廿三條香蕉呀？
• 
  
• 佢又解釋俾我知，廿三條係政府諗出嚟害我哋架﹗哦，原來係咁，但係廿三條究竟係廿三條乜嘢呢？廿三條香腸？廿三條皮鞭？佢始終都冇同我講喎，不過既然佢話係有害既，咁就勢係假，一定要阻止佢發生﹗
• 
  
• 點樣阻止佢發生呀？係政府搞架喎﹗我哋呢啲小市民，邊有say呀﹗
• 
  
• 個乞衣就同我講︰「後生仔，唔駛怕，只要你七月一號嗰時跟我哋去遊行，咁就得架喇。」
• 
  
• 係喎，乞衣係律師嚟架嘛，佢講既嘢唔會錯既﹗反正喺屋企日日俾隻乸管住咁冇癮，一於跟佢去遊行啦﹗

===================================================================

• 
• 
  
• 嗰日遊行之後，都咪話唔神奇，嗰廿三條香蕉真係俾政府食番落肚。
• 
  
• 我終於感到前所未有既一份優越感。我俾我隻乸控制咗咁耐，我今日終於可以控制番一樣嘢。就因為我去遊行，搞到政府食蕉﹗喂，唔係嘢小架我，就係我一個人呀，政府都要聽我支笛呀﹗
• 
  
• 我今日番到屋企，唔再聽老婆話，我仲叫佢幫我揼骨，幾梳乎呀﹗

===================================================================

• 
• 
  
• 自從我變咗大男人之後，老婆都聽晒我話。
• 
  
• 全靠嗰個乞衣咋。
• 
  
• 聽聞政府又要填海喎，好似話係因為中環大塞車。超﹗中環塞車關我春事咩﹗我坐火車轉地鐵番工既﹗填咗海，影響生態架大佬﹗
• 
  
• 點影響生態？唔知喎…總之係影響啦，對世界唔好既﹗
• 
  
• 上次跟條乞衣去遊行，政府就即刻食蕉喇，今次都可以依樣畫葫蘆呀。我同幾個朋友，一齊搞起個function，希望又令政府食蕉。今次反應好好呀，仲有好多大狀出面幫我哋手打官司，貴就貴啲，不過可以令政府食蕉，滿足下我既慾望，算啦，俾佢哋賺啦﹗
• 
  
• 嗱，你都知道啦，我哋又成功咗令政府食蕉喇﹗

===================================================================

• 
• 
  
• 你都唔好話，一次又一次，我真係覺得令政府食蕉好過癮呀﹗
• 
  
• 我哋呢啲小市民，有乜嘢要求吖，最緊要過癮，我理得佢政府做乜吖，最緊要我哋可以參與吓，搞吓破壞，咁咪證明到我哋存在既意義囉﹗
• 
  
• 喂，你有冇聽過紅灣半島？唔係紅山半島喎﹗
• 
  
• 我今日番屋企問我老婆，佢話唔知喎？可怒也﹗我一個公事包車埋佢塊面度，點可以咁冇政治智慧架﹗
• 
  
• 佢反問我，紅灣半島關政治智慧乜事？
• 
  
• 我話佢知︰「死蠢﹗紅灣半島要拆呀，係咪影響世界環保生態先﹗你攞啲政治智慧出嚟啦，而家全香港既人都好有政治意識架喇﹗」
• 
  
• 佢又問︰「咁攞政治智慧出嚟又點啫？」
• 
  
• 我話︰「嗱，乜嘢叫政治智慧呢？就係你要知道紅灣半島喺邊度，拆咗之後呢，地產商賺大錢，但係又冇我哋份，仲嚴重影響宇宙生態系統添﹗嗱，要為香港好，就要推翻地產商既決定，唔俾佢哋拆樓﹗」
• 
  
• 佢問︰「吓？我哋點樣推翻地產商既決定呀？仲有，咁樣點樣算係為香港好？唔會嚇到其他人都唔敢投資架咩？」
• 
  
• 我話︰「推翻好簡單架咋，我哋市民的呼聲就夠﹗梗係為香港好啦﹗俾外國商人睇到，香港人咁重視環保，又咁團結，佢哋仲唔爭相嚟香港投資咩﹗」
• 
  
• 佢問︰「市民的呼聲？」
• 
  
• 我話︰「係呀，你唔知咩？而家香港係由市民嚟管架，你老公我都有份架﹗」
• 
  
• 佢問︰「唔係啩，你有份管香港？」
• 
  
• 我好自豪咁話︰「駛乜講，你睇住嚟啦，我一定可以令到地產商唔拆樓﹗」
• 
  
• 做生意唔可以淨係顧住商業利益既，應該以道德環保為首﹗呢個就係我做人既宗旨，我開嗰間書店，三百幾呎，做咗咁多年呀，從來唔係話利字當頭架，街坊熟客嚟買嘢，邊好意思收佢地錢丫，街坊街理，買支鉛筆，梗係送番本碧咸自傳俾佢哋先得架嘛，咁先係生意道德嘛﹗睇，我檔書店做得幾成功，做咗十幾年，屹立不倒，而家仲縮埋到一百五十呎，慳地方，環保吖嘛﹗

==================================================================

• 
• 
  
• 我又同嗰幾個乞衣朋友一齊搞搞震。今次仲犀利過舊時，因為今次唔單止要政府食蕉，仲要控制埋兩個大財團喎﹗你估嘢少呀？我哋幾條茂利咁吹兩嘴，就有力過人地董事局喇。嗱，你估做Director容易架？我話你知，我就做到喇，仲要係兩間大公司既Director添﹗
• 
  
• 我個女都有份架，佢畫咗幾幅圖畫，反映拆樓既壞處同埋對環保既影響，仲攞到獎添﹗喂，咁有政治觸覺，佢一定會係未來既女特首啫﹗
• 
  
• 今日嗰幾間公司終於屈服，決定唔拆樓。嗱，我都話我哋市民係負責管香港架啦，睇吓﹗up兩句，搞到兩間公司都冇鞋挽屐走喇﹗
• 
  
• 老婆又同我講︰「喂，人哋都順你哋意啦，得些好意須回手，唔好咁賤嘴話乜民意勝利啦。」
• 
  
• 我又抦佢︰「賤嘴？咁邊算賤嘴﹗我就係要話俾全世界既人知，喺香港，究竟邊個話得事﹗」
• 
  
• 老婆話︰「唉呀，咁犀利咁話得事，不如入番幾手領匯俾我吖﹗」
• 
  
• 我話︰「超﹗老早交咗form啦，都唔知抽唔抽到﹗」
• 
  
• 老婆話︰「喂，好多人話要反對佢上市喎，你今次又唔反埋一份？」
• 
  
• 我話︰「我有政治智慧架嘛﹗領匯賺梗既(註︰純屬大市民個人意見)，做乜要同錢過唔去喎。啲人都唔化既，上市咪上市囉，有乜所謂喎﹗啲人唔抵得自己冇份分咋嘛﹗」

===================================================================

• 
• 
  
• 今日我番到屋企，又諗住搵個公事包車我老婆一下過吓手癮，點知搵勻全屋都搵佢唔到。
• 
  
• 最後我淨係喺睡房搵到封信，個死婆話，頂唔順我呢個大男人，跟鬼佬走咗去英國﹗
• 
  
• 日日喺屋企孤零零，都咪話唔悶。唉﹗不如約嗰幾個乞衣出嚟，搞番啲遊行散吓心好過啦。
• 
  
• 遊行呀，掛咩旗號好呢？求其啦，志在約番幾十萬人行吓街啫，為乜喇喎，邊個理吖﹗

==================================================================

• 
• 
  
• 咦喂，最近西九龍嗰邊都嘈得好劇烈喎﹗
• 
  
• 曾蔭權話之前已經做左公眾咨詢喎，妖﹗公眾咨詢我鬼知咩，而家我先聽到有人講咋嘛，之前嗰啲點可以算數架﹗
• 
  
• 搞文化藝術喎，我都唔睇既﹗自從幼稚園開始美術堂我都冇興趣咯，唔好話咩名畫呀、文化呀咁啦。嘥氣既，我哋呢啲草根，邊會識文化藝術吖，搞埋呢啲嘢，咪淨係益嗰啲藝術人﹗又益我唔到，有鬼用咩﹗最好呀，連幼稚園啲美術堂都鏟埋，改晒做經濟堂﹗喂，香港係國際金融中心嚟架嘛，梗係講利益講錢架啦，講文化講藝術，講埋道德吖笨﹗都唔化既，嗰撻地，咁鬼靚，拆開嚟賣就最好，政府又賺到錢，起多幾層高樓大廈唔好咩？
• 
  
• 我個女又同我講，仲起埋咁多高樓大廈，會影響空氣質素喎。改善空氣質素係政府既責任嚟架嘛，政府搞唔好，就要負責，董建華係咁架喇，廢既﹗
• 
  
• 講番個西九吖，計我話，一定又係政府同啲商家私相授受啦。喂，睇吓嗰個鍾麗幗，擺明當我哋啲小市民冇到啫﹗你話呢件事點可以唔追究到底吖﹗所以我成日話，董建華既政府冇用架，連個小小公務員呢啲雞毛蒜皮既事都管唔好﹗

賴活不如好死掉

• 安樂死的問題，素來都是爭論不休。但爭論對錯，根本就沒有可能有絕對的結果，因為這不是加減數的問題，而是正反兩方平衡的問題。


• 所謂安樂死，是讓久病於世而無法治愈的人盡早了結，避免耽於痛苦。人家要死而不讓人家死，等如逼使人家痛苦。如果病患本身已無活動能力，他除了咬舌自盡的話，就只能活活受人家擺佈折磨；如果病患本身尚能走動，不讓他死，等如叫他自殺。但既然你不給他安樂的死，他也會自殺死的話，為何一早不給他安樂的死呢？
• 
  
• 又有人認為，推行安樂死，會引來濫用的問題。濫用，對病者來說，就是輕易求死，也就是讓醫生或其他人有機會用不正當手法弄死病人而以安樂死敝之。對病者來說，如果能合法的安樂死會讓他更輕易求死的話，他根本沒有甚麼生存意志，他是怎麼樣也會找死的了，況且真的要死，先簽署不予急救同意書，除時可以死；其次如果有人想害死病人，待他病發時故意不行救治，已經能名正言順的害死他了。
• 
  
• 先別理會安樂死好不好，不是重點。
• 
  
• 究竟自殺是甚麼回事呢？
• 
  
• 死可以有兩個性質，一是慘死，二是抵死。
• 
  
• 長期病患受不住病魔煎熬一躍而下，是慘死，但這是他選擇的解決方法，慘是慘，卻瀟灑撇脫。
• 
  
• 對長期病患來說，死掉，比賴活着更輕鬆自在，死有何懼？這種死，慘，而可敬。
• 
  
• 中四學生不堪功課壓力失控跳樓，是抵死。全香港的學生都受着一樣的壓力，考一樣的試，讀一樣的書，我不明白為甚麼人人都能受得住，偏偏那幾個人受不住。他們跳樓不是因為壓力，是因為他們無知，不懂應付壓力。活這麼久，也未學懂應付99.99%學童也能應付的壓力，「唔死都冇用」。
• 
  
• 與認識三天的男朋友分手，原因是男朋友與認識五天但已分手三天的女朋友復合，繼而「大受打擊」，危坐行人天橋，一個人隊掉半打啤酒，不勝酒力差錯腳墜地身亡，也是抵死(下面的路人甲反而慘死了)。
• 
  
• 啪丸也算是自殺一種，雖不為意，但卻可算是一種誤殺。年青人落D，狂吞兩打藍精靈，配以男伴特製的迷姦雞尾酒，登時口吐白沬返魂乏術。家人翌日向蘋果記者哭訴死者平時是「乖乖女」，每個月起碼有一個星期在家中睡，對家人孝順，今次是她第一次「貪得意」跟隨朋友落D「見識」。這都是抵死。
• 
  
• 為甚麼那個中四學生和與認識三天的男朋友分手的女孩要自殺呢？因為報章報導類似新聞的標題，錯用了「慘死」一詞，讓他們以為這樣「慘死」，會讓人同情。那學生以為這樣死掉，是對學校老師每星期要他做一篇中文作文的沉重功課壓力最有力的控訴；那女孩以為這樣死掉，會讓那男人後悔一生，誰知那男的看完新聞，也不知死掉的是她，因為他根本不知道她叫甚麼名字。
• 
  
• 這種人，與其苟且獻世，不如老早死掉，以免阻住地球轉。
• 
  
• 如果報章對待這一類的新聞，冠以「中四生不堪功課壓力(註︰每星期中作一篇)跳樓抵死」和「無知少女被騙不自知，矇查查跳樓抵死」的標題，讓他們知道他們自殺，是不讓人同情，反而讓人不屑的，他們就不會打算自殺。狠心地以不敬字眼作標題，長遠來說比撒瑪利亞防止自殺會閃閃縮縮的宣傳更為有效。

「講」東話

• 身處香港，一個「國際」都市，其實一點也不國際，而且還有點鄉巴。
• 
  
• 之前也有好幾次提到香港的語言問題，但主要都集中在英語方面，今次或許可以談一談中文，或者更specific的，談一談廣東話。
• 
  
• 
  
• 廣東話讀得不好，比英文讀得不好更抵打。你把「Jot」 notes 當成「Drop」 notes也情有可原；有些人把Thank you miss 讀成 Fank kiu 搣時也沒關係，我們大家都同情這些人。
• 
  
• 「樂」這個字，作名詞之用讀「落」，作動詞之用讀（牛鬧切），所以快樂的樂不同於仁者樂山的樂。
• 
  
• 
  
• 「希臘」的「臘」，其實我們一定懂得讀，臘腸臘鴨，但不知為甚麼，一拼在「希臘」當中，很多人便把臘鴨的臘和打獵的獵同化了，讀成「希獵」。這情況類同於「埃及」，很多人都懂得把「塵埃」讀作「塵哀」，卻把「埃及」讀成「i 及」。
• 
  
• 昨天晚上在電視上看到一個關於「愛國教育」的時事節目，訪問一名校長，不知是中學還是小學，是中學尤是可，是小學的話我會提議將其槍斃。她犯了甚麼事呢？她在節目中侃侃而談她對愛國教育的意見︰「我都好希望可以培養到我啲學生愛多啲角…唔…我覺得呢，愛角教育呢，係好唔容易架囉，唔…係囉，因為愛角呢…(下省)」
• 
  
• 
  
• 這位厚顏無恥的校長，大談其愛角宣言，還立志要讓其學生都一併愛角去，如果該校家長看到這一片段，下年這間學校一定可以停辦了。為甚麼我說「是中學尤是可，是小學的話我會提議將其槍斃」呢？因為語言這東西，學習的黃金期在於兒童階段，在這段時期學得好就好，不好就不好，長大之後再怎樣惡補也難以補出個鳥來。所以，幼稚園、小學、及初中的教師的語文水平是最為重要的。別以為校長不教中文便可以隨意宣揚其愛角思想，她在早會時的講話，都會把學童傳染了。校長可以不懂化學，但必需對她在學校會操的語言有所修養，或是廣東話，或是英國話，或是美國話，或是普通話，但無論如何，絕不能為愛角話。
• 
  
• 「國」與「角」之不能分，正如「廣」與「講」之不能分。
• 
  
• 
  
• 我見過有姓鄺的把英文姓氏寫成「Kong」，把名中的「國」寫成「Kok」，這都是不能接受的，「國」寫成「Kwok」還未算十足，該以「Gwok」甚至「Gwog」為標準。姓名的譯音，因語言不同，難以十全，但略費心神，總會拼得好一點。
• 
  
• 既然提到中文名譯英文的問題，那就順便提一提英文名譯中文的問題。
• 
  
• 香港是中國其中一個城市，以方便起見，兩地對於外文的譯音，有時會以普通話譯法為依歸。其實以普通話譯，多數較準確。例如說碧咸譯作「貝克漢姆」，用普通話讀起來，很近似「Beck-am」，朗拿度譯作「羅拉爾多」，很突出香港人多數忽略了的「L」音。如果不懂人家語言的正確讀法，參考普通話譯音是不錯的方法。例如說「約翰尼斯堡」，為甚麼是「約翰尼斯堡」而不是「祖翰尼斯堡」？因為那個「J」其實是讀成「Y」。
• 
  
• 
  
• 想要知道英文的正確讀音，或許真的比廣東話容易，因為實在太多人在說「講東話」了。

理想國

• 理想的國度，應該是怎樣的呢？我給各位遊行者設計了一個SimCity，看看你們滿不滿意。
• 香港永久脫離中國，成為無主孤島，雖然各番邦會乘此機會剝削香港貿易利益，但沒相干，我們只要自主，就要有自主，淪陷了也沒相干。
• 對香港總統實行一人一票投票制，每次任期一年，以確保有任何不滿可以盡快更換。總統不得連任，而每位總統卸任後必須遊街一天，讓滿意的市民和總統握手，不滿的市民可以隨意但切實的作人身攻擊。雖然一人一票選的來的總統大多數會是一個工會主席，但沒相干，香港工人太多，以少數服從多數的原則為準。上任總統及大小官員必須為聖人，但凡犯一小錯，必須立即下台。若果香港因為颱風而多處水淹，全體官員必須立即公開道歉並下台，而且一概家屬終生不能再涉足政壇。提議首三名總統候選人為李柱銘、楊森以及劉慧卿，此三人眼光獨特，毫無私心，無論睡覺出恭，無時無刻不在為香港利益著想，置個人生死於度外。
• 所有政策一律在正式施行後一個月切能落實，確保所有市民能在後知後覺的情形中，有充足時間示威抗議。就算是立法局裏面的屎渠爆了，也應該把屎渠部分呈上立法會，研究是否應該更換，而民間同時可以成立「立法會爆屎渠關注小組」以監察政府，同時小學生應設立「小學生立法會爆屎渠關注聯盟」，以提高小學生的通渠知識。同時亦可委任幾名大狀，推動「金銅片保護屎渠行動」，全港市民拿着金銅片，手牽手在立法會把屎渠爆裂部分蓋着，以免倒瀉屎。
• 在立法會，除了把勞永樂提早把SARS調查報告內容於業界洩漏，還需研究為甚麼他說那一天洩漏，而不是今天，昨天，或是明天。而他給業界的信的格式，亦應該在立法會研究，看看有沒有錯漏，之後按照投票結果，更改勞永樂的會考成績。同時，立法會必須研究，為甚麼衛生署的小冊子建議洗手要洗十五秒，而不是十四秒或者十五秒半，究竟訂立十五秒的人有甚麼陰謀。每天總統都要到立法會作答辯，因為總統之前一天無論做了甚麼，都是構成要他下台的錯誤。而整個答辯，可以播帶咪嘴，因為某幾位議員每天都是重複同一樣的說話，例如要總統下台，或是要推行一人一百票的選舉制度，更要求香港人要取得為美國總統選舉投票的資格。
• 所有愛港思想必須打壓，「倫住嚟試」一類低等無建設性節目一律禁播。全港只准設立三個電台，分別由鄭經翰、黃毓民及李鵬飛主持廿四小時直播。由施政失誤的官員以致掃街時掃漏了一塊樹葉的清潔工人，逐個逐個清算身家，誅連九族。即使是主持人晚上吃飯睡覺打鼻鼾，也得直播出街，因為那是香港的呼聲，出恭聲則為香港的糞怒。如果有朋友問候你家人可好，你可以立即報警，犯人作間諜罪議處；如果人家稱讚你老婆好靚，即可當作是嚴重恐嚇，犯者立即押解往軍事法庭與候賽因共審。自此，小一的中文科第一課不能是「早上，哥哥說，妹妹早；妹妹說，哥哥早。」因為這是恐嚇。
• 為求提高小學生和幼稚園生的政治意識，升中試必須設立政治科。所謂政治科，分成兩個部分，第一部分是要考生把社會上發生的好事都說成壞事，把壞事都說成是政府搞事。例如有架巴士掉下天橋，明明是旁邊的貨櫃車司機胡亂切線，但考生都必須把事件說成是政府施政無方令巴士自動掉下天橋；或是有登革熱爆發，都需說成是總統吩咐衛生部長從非洲故意用FedEx進口白紋伊蚊，有沒有看過FedEx的彈彈包裹？裏面就是楊永強訂購的白紋伊蚊。試卷第二部分是要學生用一些惡毒而無建設性的批評字句評論社會，例如政府決定殺掉幾間垃圾學校，考生不能評論事件的緣由理據，而是要嚴厲批評政府運輸署署長以及中國副總理，並提出六四事件的發生經過以証明殺校有罪。
• 廢除基準試，即使滿口「I is an boy」的嬸嬸也能當英語教師。隨時歡迎教師絕食抗議，只要有超過五個教師因絕食昏倒，張文光立即獲頒金屎渠勲章乙個。一旦絕食，政府立即額外開設五千間學校，每間學校實行一比一小班制，一個老師對一個學生，以確保所有老師均有肉食。
• 每年訂立三百六十五天的英語日，以示對英國養育之恩的感謝以及臣服，將違例使用中文刑事化，因為中文是中國極權魔魘的化身。
• 但凡星期天定為遊行天，軒尼斯道及彌敦道全面封閉，一概店舖一律不得營業，讓市民一家大小在三十四度高溫低下遊街示眾。小朋友全部由父母負責打扮，掛上小朋友不知道是甚麼的口號，然後讓報章影相，寫成「小朋友也遊街」的專題報道。而這些專題報道可提交往英國或美國的新聞展，就蝦鬼佬看不懂中文，以為你影到甚麼人間溫情。同時因為每星期遊行而生意大受影響的商戶，也可以一同遊街，以抗議其他人遊街的行為。在這個理想國，其實不需要立法會，因為市民每星期的遊街，便代表了政府的決策，他們自己要甚麼，上一上街，便可以有甚麼。例如他們家中沒有米了，他們發動廿萬人上街，然後訛稱有五十萬人，然後要求政府派米，政府便會派米；要求美國政府投放核子彈到北京，以洩中國政府剝奪人權之憤，美國政府自當照辦。整個世界，由幾個煽動人民的搞gag政黨控制。
• 說到樓市，在正常的國土，沒人有會希望物業價格高企，但在這理想國，價格越高越好，因為樓價是量度政府施政質素的proxy，樓價越高，証明政府越好，總統越好。所以升中試除了政治科外，加設大富翁比賽，把箕基灣和西灣河等地皮價格大幅增加五千倍，而淺水灣和半山的地皮則增加五萬倍，但各人獲派金錢不變，讓學生感受樓市不停攀升的歡愉。物業價格的大幅攀升，解決了負資產的問題，因為負資產都變成了杏加橙。
• 為求對無助者提供更周全保障，但凡學歷只在高中畢業或以下者，不論年少老幼，每月一概發放一萬元生果金，另設房屋汽車津貼共三萬元。
• 同時，因為開支增加，必須改善稅收制度。稅基無疑是要開闊，但為了保障低下層，低級煙草和啤酒不能設稅，掃把佬和Skyline等死飛仔車(這裏的「死」作動詞用)亦不能設稅。相反，雪茄、紅白酒則設1997%稅款，以紀念97年香港曾經回歸中國。入息稅則作遞增算，月薪八千元以下，入息稅為負100%，以配合李卓人提出，月薪一萬六千元的最低工資。一萬六千零一元至三萬元則為0%。三萬零一元至十萬元應付400%，因為這些人除了自己的月薪外，還有物業股票投資和炒賣的利潤，而這些玩意對月薪三萬或以下家庭而言，只有蝕本的份兒。十萬零一元以上的一律為1000%，而李嘉誠為個別例子，因為他做生意太好，規模太大，令人看不過眼，又吹佢唔漲，所以他整個家庭每月收入及家產應當全部充公。
• 就如窈窕淑女，只在讀詩是閉上眼晴看得到，一張開眼，大千世界裏，沒有了。香港即將成為一個傳說，就如Utopia，聽起來很美很美 --- 但就只是一個傳說，因為在世界上再找不到了。